الثلاثاء، 29 نوفمبر، 2011

مكملين



عاوزين استقرار وعاوزين البلد تقف على رجليها وعاوزين لقمه العيش وعاوزين بتوع التحرير يروحوا وكفايه كده .......... طب والكرامه هانقبل تانى نعيش عبيد ؟



حد يقولى دى عملت ايه عشان يعملوا فيها كده ؟ ايه الحقد والغل اللى جواهم ده بينتقموا منناعلشان طالبنا بحقنا فى عيشه كريمه ؟



جدع يا باشا ومبسوطين وفخورين بالباشا اللى فقع عين الواد ومستغربين ليه اذا كان اللى قتلوا الشهداء ايام الثوره لسه ماتحاكموش !!!!!
عاوزه حد من بتوع حزب الكنبه يرد عليا ؟
بتوع التحرير خربوا البلد يامعلم سلطان...... البلد هاتشحت يا ابو السلاطين ...... طب والغاز اللى اتضرب فى 6 ايام واللى تمنه ملايين جبتوه منين ؟ مش الفلوس دى اولى بيها الغلابه ؟ والشحنه الجديده مش اولى كنت اشتريتوا بيها قمح احسن ؟
هنا خشوا واتفرجوا
مين دلوقتى اللى عاوز يخرب البلد؟
مين اللى لم البلطجيه ودخلهم جحورهم دلوقتى عشان الانتخابات تكمل ؟
لا وسبحان الله نفس البلطجيه اللى عيشهم انقطع من الانتخابات بعتوهم يضربوا المعتصمين ماهو المعتصمين فى التحرير هما الحيطه المايله.

وتستمر المسرحيه العبثيه انتخب ايه؟ وهو برلمان منزوع الصلاحيات مخلى زى السمك الفيليه كده لا يشكل حكومه؛ ولا يستجوب وزرا ولا يحاسبهم؛ ولا يصدر قوانين؛ ولا يعمل اى حاجه غير انه يقول للعسكر حاضر عشان الديكور يكمل وكفايه البرستيج للبهوات للاعضاء الموقريين.............. سيبك انت الركنه فى جراج مجلس الشعب حاجه تانيه وطظ فى الثوره وطظ فى الشهدا مش المرشد زمان قال طظ فى مصر ؟
ولو اتكلمت ساعتها يقولك ماهو مجلس منتخب وانتوا اللى جايبينه مش بقولك عبث !!!!!
مين اللى من مصلحته اعاده انتاج النظام القديم بنفس قرفه وفساده ؟ مين اللى مش عاوز القانون يمشى على الوزير والغفير بنفس القدر؟ مين اللى عاوزنا نعيش خرفان و جزء من القطيع؟
لا والعجيب ان العسكر هما اللى بيدفعونا دفع للانتخابات
طب هو فى حد يقلص صلاحيات نفسه بنفسه ؟ فى حد نقوله سلم السلطه لحكومه انقاذ يقولك لا نعمل استفتاء وفى نفس الوقت يزقك على الانتخابات اللى هاتجيب برلمان يحاسبه ويسأله ؟
فكر كده مع نفسك وحكم عقلك هاتعرف .......... واحنا برضه مكملين

الأحد، 14 أغسطس، 2011

فلنكتفى بهذا القدر وسيب الميكروفون

تطل علينا الصحف وبرامج التوك شوز بأخبار الاخوه السلفيين اللى ماكناش بنسمع لهم صوت ايام المخلوع ولا تعليق على اى من جرائم النظام الفاسد ؛ حتى فى خطبه جمعه لغايه ما الشعب قام بثوره يناير .
واللى كان شيوخهم بيكفرونا وبيحرموا الخروج على الحاكم وبيطلبوا من الناس يروحوا اتفرجوا واحكموا .


بس لا احنا مش هاننسى مواقف اللى كانوا معانا واللى كانوا ضدنا برضه ؛ الاخوه اللى بيطلبوا دلوقت تطبيق الشريعه كنتوا فين من تلاتين سنه ماطلبتوش ليييه تطبيق الشريعه من المخلوع ونظامه ؟
وبعدين هى الشريعه بتقول انك تروح تقنع اهالى الشهدا انهم يتنازلوا عن القضايا وياخدوا قرشين ويحمدوا ربنا بمنطق اهو احسن من مافيش ؟
ربنا سبحانه وتعالى قال : (ولكم فى القصاص حياه يا اولى الالباب )وان كنتوا تقصدوا الديه امال فين حد الحرابه ؟
الناس دى بتستهتر بالقانون وتطبيقه ومش عاوزين القتله يتحاكموا امال لو مسكوا الحكم هايعملوا فينا ايه ؟



لا وايه الشيوخ الكبار تلاقى الشيخ من دول عايش فى قصر منيف وراكب عربيه بالشئ الفلانى ويقول للفقرا التظاهر من اجل طلب الحقوق حراااااام يا حلاوتك يا شيخنا امال ايه اللى حلال ؟
و فاتح قناه فضائيه بتمويل خليجى طبعا بتدخله ملايين سنويا من الاعلانات ماهو اللى بيتفرجوا عليها انصاف المتعلمين والناس البسيطه اللى ماكانوش لاقيين نفسهم فى ظل النظام الفاسد فبيمشوا وراه عشان يمكن ياخدهم للجنه ؛ و بيستغل ده اسوأ استغلال فى جنى الارباح وحسبى الله ونعم الوكيل .
وكلنا عارفين الدور اللى لعبتوه فى الاستفتاء وغزوه الصناديق واللى مش عاجبه امريكا وكندا موجودين ؛
وبعدين ازاى هاتطبق الشريعه و عندنا مصريين مش مسلمين هاتعمل فيهم ايه دول النبى صلى الله عليه وسلم لما دخل المدينه عاش مع كل اهل المدينه مسيحين ويهود وكفار كمان وماكانش متعصب زيكم والنبى ص برضه قال( استوصوا بأقباط مصر خيرا)
لو سعادتك طبقت الشريعه هتتعامل مع المصريين المسيحين ازاى ؟
يعنى مثلا لو فى عصابه سرقت بنك والعصابه دى فى منها مسلمين ومسحيين هاتقطع ايد المسلم طب والمسيحى الغير خاضع للاحكام دى لو قطعت ايده منظمات حقوق الانسان ودول اجنبيه كتييير هاتتدخل وتعمل مشاكل ويمكن تقلب باحتلال يا ريس بحجه الدفاع عن الاقليه المضطهده طبعا.
الدول اللى بتطبق الشريعه بيطبقوها على الامراء وكبار القوم اللى سارقين وناهبين شعوبهم ولا بيطبقوها على الفقرا الغلابه اللى مالهومش ضهر ؟ هو ده اللى هما عاوزينه
تبقى مصر ولايه تابعه للانظمه الديكتاتوريه بإسم الدين ربنا مقالش كده ونبيك قال لو فاطمه بنت محمد سرقت لقطعت يدها انتوا بقى عاوزين انهى شريعه ؟
مصر دى بتاعتنا كلنا مسلمين ومسحيين وبهائيين وشيعه مصر مدنيه تستوعب كل الثقافات فلنكتفى بهذا القدر وسيبوا الميكرفون.
الديموقراطيه اللى انتوا بتحرموها هى السبب فى انكوا تنزلوا التحرير وتعبروا عن رأيكوا بحريه وسبحان الله فى نفس اليوم تحصل تفجيرات العريش ده تخطيط مين ؟ ويعنى ايه هاتحولوها اماره هو احنا هانرجع للعصر الاموى مثلا ؟ عاوزينا نترحم على امن الدوله اللى كان ممشيكوا جو الحيطان ؟ ومش فاهمه ليييه المجلس سايبكوا علينا تعملوا اللى انتوا عاوزينه؟
ياريت ترجعوا للدعوه والفضائيات والاعلانات والخطب والدروس وابعدوا عن السياسه يرحمكم الله .

الاثنين، 11 يوليو، 2011

الشعب يريد اسقاط النظام

الشعب يريد اسقاط النظام كنا نهتف بها من قلوبنا وارواحنا قبل حناجرناولاننا صدقنا انفسنا وصدقنا اننا نستطيع سقط رأس النظام ولكن سياساته وممارسته لم تسقط بعد .
عصام شرف ذلك الرجل الذى رفع على الاعناق فى الميدان خذلنا فهو يمارس نفس السياسات القديمه فى اختيار وزرائه ان كان قد اختارهم فعلا ولم يفرضوا عليه وكلهم فشلوا بجداره فى تنفيذ المطالب الثوريه رضوان اعطانا الموازنه الجديده كوبى بيست من موازنات بطرس غالى التى كانت دائما وابدا تنحاز للاغنياءعلى حساب الفقراء المهمشين ورفض ان تكون الضريبه تصاعديه ورفض ان يكون هناك حد اقصى للاجور اذا فما الذى اختلف ؟
الحكومه متباطئه تماما فى محاكمه رموز الفساد فى حين ان المدنيين يحاكمون عسكريا وتصدر فى حقهم احكاما سريعه وصلت الى خمس سنوات وعمروالبحيرى ولؤى نجاتى خير دليل بينما رشيد محمد رشيد وحسين سالم ومجدى راسخ و يوسف بطرس غالى و باقى القطط السمان ينعمون بأموالنا التى سرقوها فى الخارج اما من ينتظر فهو مابين اقامه فاخره فى شرم الشيخ واقامه سوبر ستار فى بورتو طره ولو اننا لا نملك دلائل على ذلك والشائعات تشتعل فى الشارع المصرى بأنهم جميعا هربوا الى جهات غير معلومه.
لابد من قرارات فوريه جريئه ثوريه بلا تباطؤ اهمها تطهير الوزارات والهيئات والشركات والاعلام الحكومى من بواقى مبارك اللذين تربوا فى ظل الفساد بما فيها اتحاد عمال مصر باعتباره لا يمثل العمال ولا يعبر عن مصالحهم بل انه عقبه كبيره فى طريقهم نحو حياه كريمه والحصول على حقوقهم كامله .
وزير داخليه مدنى ذو خلفيه حقوقيه وخاصه فى مجال حقوق الانسان مع اعاده هيكله وزاره الداخليه واخضاعها للمراقبه القضائيه والرقابه الشعبيه.
اين عصام شرف من الاعتصامات الموجوده فى اغلب المحافظات خرج علينا ببيان هزيل لايسمن ولا يغنى من جوع اين قتله الشهداء لماذا لم تتم محاكمتهم حتى تبرد نيران الاهالى اين القناصه اللذين حصدوا الارواح بلا رحمه فى حين ان وزير الداخليه نفى وجود قناصه فى الوزاره من الاساس
اين العدل يا وزير العدل نريد محاكمات عادله علنيه من حق الشعب ان يرى جلاديه وهم يحاكمون .
والى من يحكمون البلاد الان رسالتى لكم هى:
نفذوا للناس مطالبهم حتى يشعرون انكم ترونهم ؛ لا تستخدموا سياسات المخلوع الذى كان يتجاهلنا ولا يرانا فكانت النتيجه ان اطاح به الشعب غير مأسوف عليه تقربوا للشعب ونفذوا له مطالبه فهذا ليس ضعفا منكم ابدا على العكس انها منتهى القوه ؛ان تتفهم مطالب الناس مع العمل على تنفيذها لانريد لعبه الكراسى الموسيقيه نضع هذا مكان ذاك نريد تغير فى السياسات ليس الاشخاص اطلقوا يد شرف ليمارس مهامه كما وعدنا واذا لم يستطع فليعتذر ويترك منصبه لمن يستطيع اجعلونا نشعر انكم معنا لا علينا كنا نهتف الشعب يريد اسقاط النظام بمعنى السيستم او اسلوب الاداره ومازلنا نهتف الشعب يريد اسقاط النظام

الاثنين، 20 يونيو، 2011

يا ارض احفظى ما عليكى

يا ارض احفظى ما عليكى ده كان مصطلح شهير جدا فى المعاكسات زماااان وكانت البنت لما تسمع حد بيقول كده تتكسف ووشها يحمر قوى وتسرع من الخطاوى من كسوفها وكان رجاله الحى اللى يصدف مرورهم او قعادهم ع القهوه يزعقوله ويقولوله عيب ياقليل الحيا دلوقت الحال اختلف بقى الموضوع مش مجرد معاكسه بالالفاظ وبس بقى فى تحرشات بالايدى ووصلت للاغتصاب اللى اول مره نسمع عنه كان قضيه فتاه العتبه الشهيره جدا وتوالت بعدها القضايا غير اللى بيكتموا عليه ومايرضوش يبلغوا عشان سمعه العيله .
والسؤال هنا ليه ده بيحصل رغم ان اغلب البنات والستات دلوقت محجبات وماحدش يقولى اللبس المستفز لانى شفت بعينى بنات لابسين خمار ولبس فضفاض ومابيسلموش.
طيب حاله التحرش الجماعى المستفزه اللى حصلت فى احد الاعياد من سنتين تقريبا وكانوا بيتحرشوا بأى حاجه فيها ريحه تاء التأنيث ده كان ايه ؟ احتمال يكون ليه علاقه بتحرشات بلطجيه الداخليه بالصحفيات على سلم نقابه الصحفيين فى الاستفتاء الاسود ودى حادثه شهيره كلنا عارفينها قالك بقى ماهو المخبريين بيعملوا كده اشمعنا احنا!!!!
الموضوع داخلى بين الانسان وضميره واحساسه ان ربنا شايفه للاسف التدين بقى ظاهرى بطول اللحيه وقصر الجلباب لكن القلب مايعلم بيه غير ربنا ومش بعمم لكن ناس كتير كده مجتمع بيفكر بنصه التحتانى والفياجرابقت اهم من رغيف العيش وتلك مصيبه لو تعلمون هما شايفين اننا سلعه زى اى سلعه شايفين اننا عوره ومكانا البيت يعنى يقولك لو انت محترمه اقعدى فى بيتك ايه اللى ينزلك كان المفروض اننا نستخبى ومانشوفش الشارع لا يا بهوات الطبيعى انى احس بالامان فى الشارع وامشى فى اى مكان من غير خوف الكلام ده كان ينفع ايام وأد البنات ايام الجاهليه مش فى القرن الواحد والعشرين ايه كميه الجهل اللى بنعانى منه ده.
اسماء بنت ابى بكر ذات النطاقين كانت بتمشى لوحدها فى انصاص الليالى تودى الاكل للنبى عليه الصلاه والسلام وسيدنا ابو بكر فى الغار من غير ما حد يتحرش بيها واحنا دلوقت مش مآمنين على نفسنا فى الشوارع فى عز الضهر هل ده يعقل ؟
ده حتى الاطفال مش بيسلموا من الاغتصاب والتحرش من جار او مدرس او قريب ايه اللى احنا بقينا فيه ده ؟
غابت الضمائر وغاب الخوف من العقاب وغاب الخوف حتى من الله وهو يراقبنا ويعلم ما نفعل احنا محتاجين توعيه وبكثافه هل ترضاه لامك ؟ او لاختك ؟ او خالتك او عمتك او بنتك ؟ فين الشهامه فين الرجوله لو واحد اتحرش ببنت او ست ماحدش بيقوله يابنى عيب كده مايصحش للدرجه دى فلحوا فى انهم يدمروا جيل كامل ؟ مش فاهمه الحقيقه اللى فاهماه انى من حقى احس بالامان فى بلدى من حقى نظره المجتمع لى تكون ارقى من كده انا مش سلعه ومش جاريه عصر الجوارى انتهى.

الجمعة، 17 يونيو، 2011

اضرب المربوط يخاف السايب

اكيد سمعتوا طبعا عن الفلاحين والطلبه اللى اتقبض عليهم من كام يوم والنيابه قررت الافراج عنهم بكفاله عشر الاف جنيه مصرى وبعد الضغط الشعبى من الناشطين وبعض المواطنين المتعاطفين تم الغاء الكفاله .
انا بقى عاوزه افهم هما لو لاقيين ياكلوا وعيشتهم مرتاحه هايروحوا يعملوا مظاهرات ليه ؟
ومعتصمين ماسبيرو سكان مدينه السلام اللى نايمين فى الشارع وفى واحد منهم غرق فى النيل عشان قفلوا دورات المياه اللى هناك لاجبارهم على فض الاعتصام دمه فى رقبه مين يابهوات ؟
و مريم عبد الغفار العامله البسيطه اللى كان حلمها تعيش كويس وتجوز ابنها دهستها سياره نقل ودهست احلامها واحلام ابنها علشان البهوات قرروا يفتحوا الطريق للعربيات ليجبروا المعتصمين على الرحيل .
صوت العمال المطالبين بحقوقهم كانت مدايقه سعاده البيه اللى قاعد فوق فى مكتبه فى التكييف فكرونى بأصوات افراس النهر اللى كانت بتزعج ملك الهكسوس فى طيبه.
ماهو يابيه لو كنت حسيت بمشاكل الناس دى ماكنتش تدى اوامر بفتح الطريق عشان مريم تموت وسبع افراد غيرها يتصابوا بدال ما تفتحوا مكاتبكوا المكيفه للبهوات رجال الاعمال اللى ماصين دم العمال الغلابه وتنفذوا مطالبهم فى خمس دقايق كان لازم تنصرواالعمال الغلابه على البهوات اصحاب المصانع اللى عاوزين الربح الف فى الميه والادهى من كده ان الحكومه اللى كنا فاكرينها هاتنصف العمال والفلاحين اللى هما عصب البلد عملتهم مفاجأه الحقيقه فى صوره قانون ينص على الحبس والغرامه التى لاتقل عن خمسين الف جنيه ولا تزيد عن مائه الف جنيه بحجه تعطيل العمل وعجله الانتاج يا سلااااااااام .
والمصيبه ان القانون بدأ تنفيذه بالفعل ورجع الامن المركزى والشرطه العسكريه يفضوا التظاهرات بالقوه . والمؤلم ان بعض المسؤلين يقولك اه المطالب مشروعه بس اصل الوقت مش مناسب طيب ماهو الناس بقالها سنين بتسطعطف الحكومه السابقه كأنهم بيشحتوا منهم وكأن دى مش حقوقهم؛ وجت ثوره يناير اللى الغلابه دول افتكروا انها هاتحقق احلامهم بس اللى حصل انهم كل شويه يمسكوا كام واحد ويحولوهم للنيابه بسياسه اضرب المربوط يخاف السايب عشان الباقى يخافوا ويخرسوا بس مش حايحصل لان القانون ده باطل الاضراب مشروع مشروع ضد الفقر وضد الجوع وكل دول العالم بيحصل فيها اضرابات واعتصامات للعمال وماحدش بيطلع يقولهم انتوا بتعطلوا عجله الانتاج ولا ان دى مطالب فئويه ياعالم ياللى بتقولوا فئويه اسمعوا الناس وحاولوا تحسسوهم انكوا معاهم ونفذوا مطالبهم قدر استطاعتكم والا ارحلوا واتركوا اماكنكم لمن يستطيع .

الأربعاء، 15 يونيو، 2011

هما شايفينا ازاى ؟

انهارده صحيت فى مود مش اللى هو خالص قررت انزل اروح ع الكوافير اروش يعنى واليكم ماحدث :
انا : هو المحل فاضى كده ليه على غير العاده ؟
فتاه البادى كير (رانيا ) : يامدام الحال واقف الله يخرب بيت الثوره على اللى عملوها
انا : ليه يابنتى انتى مش عاوزه البلد تبقى كويسه ؟
رانيا : كويسه ماهى باظت ولسه هاتبوظ اكتر كان ماله الريس ده كان فاضله شهرين تلاته ويموت ماكانش لازم يبهدلوه ويعملوا كده
انا مندهشه : طيب يابنتى ماهو كان جمال هايمسك البلد ؟
رانيا : طب وفيها ايه ماهو متربى فى البيت وكان بيساعد ابوه وفاهم الشغلانه
انا : انتى ماسمعتيش عن كميه الفساد والبلاوى اللى عملوها فى البلد ؟
رانيا : طيب ماهو اللى جاى هايسرق برضه ولا انتى فاكره اللى هايمسكها ملاك يعنى يبقى كويس لو خدها البرادعى اللى عاوز يخربها ؟
انا بعصبيه : يخربها ازاى يابنتى ده راجل محترم
قاطعتنى بسرعه محترم ده عميل لامريكا واسرائيل وكمان البلد مافيهاش امان والشرطه نفسهم اتكسرت ياعينى منهم لله اللى خربوا البلد المترملين قاطعتها يعنى ايه مترملين قالت : بتوع الترامادول ده كانوا بيبيعوه فى التحرير عينى عينك وليله التنحى كانوا كلهم سكرانين وبيرقصوا بالمطاوى والبنات والولاد بيعملوا قباحه فى وسط الميدان انتى ماشفتيش الجيش قال عليهم ايه ؟
تدخلت زبونه اخرى فى الحوار : ايوه دى عيال عايزه الحرق طب اهو الراجل مشى والحال اتهبب اكتر من الاول وبعدين عاوزين يحاسبو الراجل على نسبه الاميه وهو ماله هو هاياخد العيال من ايديهم يوديهم المدرسه ؟
اه يانافوخى قررت ان افجر القنبله وقلت : انا كنت بروح التحرير وماشفتش اى حاجه من اللى بتقولوا عليها دى
فجأه وجدت كل من كانوا فى المكان ينظرون الى شزرا كأنى من كوكب تانى وقالت البنت : وانتى ايه اللى يوديكى وسط العيال دى وتبهدلى نفسك ماشفتيش المذيعه عملوا فيها ايه الجمعه اللى فاتت ؟
قلت : مش هما دول الثوار دول مندسين وبلطجيه ولما انا وانتى وغيرنا نقول واحنا مالنا مين اللى هايتحرك ؟
قالت واحده ست كبيره قاعده هناك فى الركن : اصحاب الامر والمشوره اللى ماسكين البلد عارفين الصالح وبيعملوه
حاولت اقنعهم بكل الوسائل والسبل مستحيل اللى فى دماغهم يتغير والمفاجأه بقى صاحبه المحل قالتلى انتى مش بتتفرجى على الدكتور توفيق عكاشه الله يباركله بيقول ان ده مخطط وان الماسونيين هما اللى عملوا كده مع الراجل اللى اسمه عمر عفيفى ؟
قلت : ده كلام كذب ومش مظبوط اللى خللى الناس تثور ان الناس قرفانه من عيشتها ؛ طيب حد فيكوا انضم لحزب ؟
ردوا حزب ايه ونيله ايه قوليلنا جيبك دخله كام احنا عاوزين نعيش هنأكل عيالنا احزاب ودستور احنا مالناش دعوه بالحاجات دى بلا ثوره بلا احزاب بلا دستور بلا نيله .
وهكذا يا ساده خرجت وانا مودى اوحش من الاول لان ببساطه احنا بنحرت فى البحر حسيت انى كائن فضائى
اتيت من الفضاء السرمدى وكان ناقص يقولولى انتى تبع الواد الجاسوس اللى مسكوه هى دى عقليات الشارع واحنا بنكلم نفسنا على التويتر والفيس بوك منكوا لله يانخبه .

الخميس، 9 يونيو، 2011

مجهولى الهويه




شيعت اليوم عقب صلاه العصر جنازه التسعه عشر شهيد مجهولى الهويه ولا ادرى كيف نصفهم بأنهم مجهولى الهويه وهم اخوتنا فى الوطن نحن جميعا اولاد الثوره نحن جميعا اشقاء ويالسخريه القدر دفنوا الى جوار ضحايا قطار الصعيد ليجتمع ضحايا مبارك فى مكان واحد.
كيف سيشعرون بالراحه و قاتليهم طلقاء كيف ينعمون بالجنه ودمهم تفرق بين ضباط الداخليه كيف يشعرون ان تضحيتهم لم تذهب سدى كيف نواجه نحن انفسنا فى المرايا ونحن مقصرون الى الان لم يحاكم ضابط واحد اللهم الا امين شرطه هارب وهو فى النهايه مجرد اداه ؛ الى الان لم يحاكم العادلى السفاح الى الان لم يحاكم مبارك المجرم الاول والمسؤل عن كل ماحدث ودم الشهداء يلطخ يديه ولم لا أليس هو من أصدر الاوامر بقتلهم ؟

كيف يمكن ان ننسى ان هؤلاء اولاد مصر ضحوا بحياتهم لنعيش دفعوا حياتهم ثمنا لحريتنا.
كيف تكون الجنازه خاليه من شباب ائتلاف الثوره اين هم ؟ كيف تكون الجنازه بدون ممثل من الازهر ؟ كيف تكون خاليه من الحكومه والمؤسسه العسكريه اللذين أدوا التحيه للشهداء ؟ اين التلفزيون المصرى ؟ لما لم يعلن عن موعد الجنازه حتى يستطيع الشعب الحضور وتصبح جنازه مهيبه حقا تليق بمن ضحوا بعمرهم لاجل مصر؟ عرفنا بالخبر من الجزيره والمواقع الاجتماعيه هل يستحق منا الشهداء ذلك ؟
حزينه الى ابعد الحدود اشعر بالقهر ولا اجد من حلمى القديم شيئا افترقنا واختلفنا وتشتتنا وراء عبث لا فائده منه عندما اتحدنا وكان مطلبنا واحد ( ارحل ) استطعنا انجازه اما الان لا ادرى الى اين يذهبون بنا ؟
لن ننساكم يا شهدائنا ما حيينا وسنظل على نفس الطريق لابد ان نكمل ما بدأناه ولن نترك حق كل شهيد كان ضحيه نظام مبارك.




لا تصالح على الدم.. حتى بدم!
لا تصالح! ولو قيل رأس برأسٍ
أكلُّ الرؤوس سواءٌ؟
أقلب الغريب كقلب أخيك؟!
أعيناه عينا أخيك؟!
وهل تتساوى يدٌ.. سيفها كان لك
بيدٍ سيفها أثْكَلك؟

امل دنقل

الاثنين، 6 يونيو، 2011

خالدغير سعيد

اليوم مرت سنه على مقتل خالد سعيد الشاب الذى كان مقتله بمثابه آخر مسمار فى نعش النظام السابق ونجحنا فعلا فى ازاحه رأس النظام ولكن ترى هل ننجح فى ازاحه ماتبقى من هذا النظام الذى تفنن فى خراب مصر ؟
كنا نهتف ارحل يا وزير التعذيب ورحل الوزير ولكن التعذيب استمر.

منذ عوده الشرطه الى العمل او هكذا يقولون...... ثلاث قتلى جدد و لا ادرى على وجه التحديد كم المصابون !ولكنهم من المؤكد كثيرون
فلقد عادوا بنفس السياسه التى تخلو من الرحمه ؛ حتى وان كانت هذه الممارسات ضد مجرم او بلطجى فهى اساليب مرفوضه ؛ تستطيع ان تقدمه للعداله ليأخذ عقابه وفقا للقانون و ليس من المفروض ان يكون عقابه الموت بأيدى جلادين وبلطجيه الداخليه .
هل اخذنا حق خالد ؟ هل تم محاكمه قاتليه؟ هل كفوا عن تعذيب الناس ؟ ابدا وحتى اللحظه خالد غير سعيد لانه لم يتغير شئ نفس الممارسات الاجراميه الغير مبرره واكثر
د / السباعى كبير الاطباء الشرعيين سابقا رحل من منصبه ولكن السياسات مازالت باقيه ولا ادرى لما يصرون على اكتساب كراهيه الناس بل انه حتى لم يقدم للمحاكمه على الممارسات الشنيعه والفساد فى المصلحه .
والمجرمين المتسببين بقتل خالد لم يحكم عليهم بعد؛ بل اننا حصدنا قتلى جدد لن يستمر ذلك ولن نقبل ان يموت انسان قد يكون بريئا مثل خالد سعيد او سيد بلال او سائق الازبكيه الذى قتل بغير ذنب مؤخرا وتقرير الطب الشرعى الذى كتب فيه ان وفاته نتيجه سكته قلبيه ما هذا العبث يا ساده واين العدل ؟
وكيف يكون خالد سعيد وقاتله مازال حرا طليقا كانت جدتى تقول حينما يكون القاتل حرا تظل روح القتيل معذبه حائره تطلب العدل لا اعلم مدى صحه هذه المقوله ولكن ما اعرفه ان خالد لن يكون سعيدا حقا الا لو نال قاتله جزائه بالقانون يا ساده.
ابسط حقوق المواطن ان يحيا مرفوع الرأس ويعامل بكرامه حتى وان اخطأ كفوا عن تعذيب الناس واتقوا الله فى هذا الشعب لا نريد سوي العدل والكرامه .

الأربعاء، 1 يونيو، 2011

الحكم بعد المداوله

الحكم بعد المداوله كلمه شهيره جدا بنسمعها فى جلسات المحكمه لما يكون فى متهم  ودفاع وممثل ادعاء اللى هو النيابه يعنى وبعد المرافعه وسماع الشهود يقوم الحاجب يعلنها مدويه الحكم بعد المداوله يعنى حضرات القضاه والمستشارين يتشاوروا سوا ويشوفوا حسب القانون الحكم يبقى ايه ؟  لكن الموضه اليومين دول هى المحاكمات العسكريه للمدنيين يعنى ولا فى مداوله ولا دفاع ولا دياولو  تتخبط الحكم من دول وانت صم بكم لان مالوش استئناف ولانقض .
الظروف اللى بتمر بيها البلد وغياب الشرطه وانتشار البلطجه والعذاب اللى احنا شايفينه ده وكمان محاكمات عسكريه للمدنيين ليييييييييييييه ؟
 الثوره كانت علشان الكرامه علشان الواحد يعيش فى بلده  ومرفوع الهامه امشى مش يجى واحد يقولى انزل على ركبك وهات يا تلطيش من غير ذنب غير انه بيطالب بحق مشروع  عاوز اعيش محترم يا اخى  مش عاوزة اهدار كرامه وسحل وكهربا غير السباب والشتايم بالام والاب واللى يتشدد لك الناس تعبت وزهقت من العيشه واللى عايشينها .
بقى المخلوع يتحاكم مدنى وفى شهر اغسطس اللى هو شهر الاجازه القضائيه يعنى تأجيل وش والعصابه كلها هايتحاكموا مدنى برضه ومافيش حد هايشرب المحاكمات العسكريه غير الشعب الغلبان عشان كان فى اعتصام سلمى او مظاهره سلميه واشهرهم عمرو البحيرى اللى خد خمس سنين و ناس كتير جدا بس احنا مش عارفينهم لانهم مش مشهورين ومالهومش حد يقدر يسلط عليهم الضوء وي زى ماحصل مع ريم ماجد وحسام الحملاوى لما النشطاء والشباب عملوا وقفه للتضامن معاهم امام النيابات العسكريه طيب دول ربنا بيحبهم ان فى ناس تضامنت معاهم ومنظمات حقوق انسان ومحامييين والاخر طلعت مجرد دردشه .
وبالنسبه للناس المحبوسين فعليا وهما مش بلطجيه وكل ذنبهم انهم بيحبوا البلد وضعهم ايه ؟ 
ارجوكم لازم يتعاد النظر فى المحاكمات العسكريه لان الناس ضاع مستقبلهم ومنهم ناس بيصرفوا على اهاليهم ومالهومش مورد رزق تانى يعنى شايلين هم عائلاتهم كمان لازم يتعاد نظر فى الاحكام .
كمان موضوع كشف العذريه اللى انا مش فاهمه هو كان ليه من اصله ؟ وقالوا ماحصلش وامبارح فى لقاء مع السى ان ان قالوا حصل وسيرتنا بقت على كل لسان والخبر كان عامل اعلى نسبه مشاهده يعنى  بقت انليمتد ليه بيتعمل فينا كده؟
وفين حقوق الانسان ؟ والبنات اللى حصلهم كده وانتهكت ادميتهم ازاى يواجهوا المجتمع اللى مابيرحمش والناس هايقولوا عليهم ايه ؟  ليه تكون هى دى المعامله بعد الثوره ؟دى انتهاكات لآدميه المواطن  لمصلحه مين وعشان  ايه يحصل فينا كده ؟
دى شهادات البنات اللى حصل فيهم كده مرعبه وكلها تقريبا متشابهه  بتقول كان فى دكتور بيكشف علينا واحنا عريانين والعساكر بتتفرج وتصور بالموبايلات للدرجه دى كرامتنا ضايعه ومهدره ؟
انا حزينه ومش متصوره ان ده حصل فى مصر وبعد 25 يناير اللى العالم كله انبهر بالتحضر والرقى والاخلاق اللى كانت فى الثوره المصريه حرااااااااااام عليكوا عاوزين كرامتنا عاوزين حقنا فى عيشه كريمه من غير اهانه عشان نعرف نعيش ونترجم حبنا للبلد بطريقه عمليه ونتباهى ونفتخر اننا مصريين .


الاثنين، 23 مايو، 2011

ختم النسر

اللي بنى مصر كان فى الاصل حلوانى اسمه على بوابتها لازال ولا زايل سامعين حلوانى يا بشر مش عسكرى يعنى كان لازم نغرق فى العسل انما اللى حصل عكس كده خالص
60 سنه من ايام الانقلاب بتاع 52 فضلت مصر تعانى وتتألم وكل رئيس من التلاته كان ليه مميزات وعيوب زى كل البشر الا الرابع ده جبار كان عاوز يخلص عليها تقولش كان بينه وبينا تار؟  والآخر عاوز ياخد عفو  ومش فاهمه بناء على ايه يعنى ؟ انه ابن المؤسسه العسكريه و اشترك فى حرب اكتوبر طيب ماهو كل رجاله مصر تقريبا فى الوقت ده شاركوا فى الحرب !
واللى غلط يتحاسب ( ولكم فى القصاص حياه يا أولى الالباب ) وقال ايه بيقولوا انه بيهدد يفضح ناس كبيره طب وهو فى فضايح اكتر من اللى احنا فيه امين شرطه بتلاته تعريفه وهربان ياخد حكم من اول جلسه والعادلى بيأجلوله واللى ورا العادلى قاعد فى شرم يعمل مابداله !
ليييييييييييييييييييه ؟؟؟؟؟؟؟؟ بتعملوا فينا كده ليه احنا كل اللى طلبناه حقنا الطبيعى والعادى اننا نعيش فى بلد حر ديموقراطى فيه عداله وحريه انا مش عاوزه اتكلم خالص على فض الاعتصامات بالقوه ولا عايزه اجيب سيره الشباب اللى زى الورد اللى خدوا حبس فى محاكمات عسكريه وهما مش بلطجيه واولهم عمرو البحيرى فى حين ان المجرميين بيتحاكموا مدنى ! ولا عاوزه اجيب سيره العنف غير المبرر والاعتقالات اللى بالجمله اللى حصلت لغايه يوم 15 مايو عند سفاره عزرائيل .
خالص ابسيليوتلى مش عاوزه اجيب سيره الحاجات دى ولا حتى حاتكلم عن لوى الدراع اللى بيحصل بالازمات المفتعله والسولار والكلام ده ولا حتى هافكركوا باللى حصل فى الاستفتاء من استقطاب الناس انها تقول نعم فى غزوه الصناديق وكله قال للدين نععععععععععم وشفت بعينى ناس قدام باب اللجنه قالولى من قال لا فهو آثم قلبه وكلنا عرفنا  اللى حصل والخناقات على نعم ولا ؛ يقوم العسكر يعملوا اللى هما عاوزينه  بالعند فى اللى قالوا نعم واللى قالوا لا كمان .
اللى هاتجنن واعرفه انتوا بتقولوا انكم حميتوا الثوره وكان ممكن يحصل لنا زى ليبيا واليمن مع ان ده فى حد ذاته يعجل بمحاكمه المخلوع لان فى اوامر فعلا صدرت بسحق الميدان باللى فيه وانتوا عارفين ورفضتوا تنفذوها طيب ليه مابيتحاكمش مش دى خيانه عظمى انه كان عاوز يقتل الشعب عشان  قال كفايه ظلم ؟
ومش هاسأل ليه اختيار المحافظين كان من رجاله الحزب ومن الداخليه وفى منهم ناس معروف ملفاتها كويس  طيب ليه المجالس المحليه اللى غرقانه فى الفساد ماتحلتش ؟ طيب ليه السلفيين يتحشروا فى اى مشكله ممكن تتحل بالقانون ؟!!
ليه فى انفلات امنى والشرطه مابتشتغلش ؟ ليه سامى الشريف بتاع الحزب الوطنى موجود فى التلفزيون وليه اصلا لسه ماعندناش اعلام حر ؟
الاقتصاد التعبان كان ممكن يتحطله خطه كويسه من المتخصصين يعملوا على تنفيذها ليه لغايه دلوقت ماتعملش حد اقصى للاجور ليه مايكونش اعلى راتب فى الدوله عشر الاف جنيه مثلا  كويس قوى بدال جيش من المستشاريين فى كل الوزارات اللى بيلهفوا ملايين فى حين ان البلد فيها ناس مش لاقيه تاكل .
طيب ليه بعض الوزرا مابيعملوش حاجه ومابياخدوش قرارات وبيخافوا يمضوا على اى ورقه ومهزوزين كل دى حاجات مش لاقيه لها تفسير ؟
عشان كل الحاجات اللى انا مرضيتش اتكلم عليها ولا اجيب سيرتها وعشان انا حاسه انى ماشيه بختم النسر على قفايا انا هانزل يوم 27 مايو  مش حاسه بالتغيير و هانزل التحرير .

وبعدين يا مصر

وبعدين يا مصر وآخرتها ايه كل يومين حكايه وروايه ونهلل ونلم الناس لسه مالحقناش نخلص من كامليا تطلع لنا عبير والمجزره اللى حصلت بسببها والشباب اللى زى الورد اللى استشهدوا علشان واحده الله اعلم بيها
والسلفيين وغباوتهم والمسحيين واحساسهم بالاضطهاد وان حقهم فى البلد ضايع واعتصام ماسبيرو والبابا قالهم روحوا بقي خلاص صبر الحكام هايخلص وهما مش عاوزين يروحوا غير لما يشوفولهم حل والقانون يتفعل اللى مش فاهمه انا ليه يعنى بعد شهر ليه مش دلوقت ؟
اما الحكايه الجديده اللى طلعت فى البخت هى سفاره اسرائيل والاعتصام اللى كان هناك امبارح والعيال الاغبيا اللى حاولوا ينكسوا العلم وختمت بالامن المركزى والشرطه العسكريه اللى ضربوا نار وغازات واللى اتصاب بالمطاطى واللى خد رصاص حى  وقبضوا على 160 شاب لييييييييييه ليه بنعمل فى نفسنا كده ؟
 مافيش اختلاف اننا بنكره الكيان الصهيونى ومش عاوزين معاهم علاقات ولا هاننسى فلسطين والحل هايكون من مصر ان شاء الله  بس مش كده ومش دلوقت اسيب شقتى مبهدله والغسيل والطبيخ والعيال بتعيط واروح ارتب شقه جارتى طب ازاى ؟
التظاهر يبقى عند الخارجيه لو انت عاوز تطرد سفير وتقطع علاقات مش عند السفاره وبعدين فلسطين محتله من 63 سنه مايجراش حاجه لو بقوا 63 واربع خمس اشهر يعنى ايه اللى خلاكوا تعملوا كده بس عموما اتفقنا معاهم او اختلفنا لازم نعترض على فض الوقفه دى بالقوه احنا عملنا ثوره عشان برضه الناس يتضرب عليهم رصاص حى ولا ايه ؟
يعنى الشرطه بخير وجت بسرعه اهو يحموا مقر الصهاينه امال ايه بقى مش موجودين فى الشارع ليه سايبين البلطجيه ليه بيربونا بيعلمونا الادب عاوزينا تانى نبوس الايادى لاااااااااااااا فى حاجه اسمها لجان شعبيه حمتنا وحمت بيوتنا وشركاتنا وماكانش فيها خريجين كليه شرطه لا كان كلهم رجاله بتحب مصر وتفديها بروحها
ماحدش يقدر يقولى مصر رايحه فين عشان انا اعصابى تعبت ومابقيتش فاهمه احنا كنا عملنا ثوره ولا كنا بنحلم

الأحد، 1 مايو، 2011

هو فى ايه ؟

 ما تمر به البلاد الان من لخبطه وعك غير مفهوم ولا مبرر من مشاكل المحافظين وقنا والمنيا اللى حصلت فيهم اعتصامات و بلاوى متلتله ورئيس الوزرا ساب كل ده وطار على الخليج يعمل حمله طرق الابواب اللى مش فاهمه ايه لازمتها اصلا ويا ترى الابواب اللى طرقها دى اتفتحت ولا ايه النظام  والمجلس العسكرى احتجب وغاب عنى لا كلمنى ولا قاللى امتى راح اشوفه
مابين المعلم سباعى سن الفيل وسيطرته على مصلحه الطب الشرعى اللى حولها ساعدته عرفى ومن غير شهود كمان وعاث فيها فسادا وهات يا ضرب وتزوير فى التقارير وكل واحد معدى من قدام المصلحه يفوت ياخدله جثه ملفوفه فى ورقه لحمه ولو عجبوك حتتين ممكن تاخد التالته على سبيل الامانه بس لغايه مايعملوا الدليفرى وتوصيل الجثث الى المنازل وعشان ماهو راجل تقيل قوى الموظف اللى اتجرأ وجاب سيرته وداه فى توكر اتقدم ضده ببلاغ والراجل اتحبس رغم انه معاه مستندات لكن ماحدش عبره ولا بص فى الورق عملا بنظريه ياراجل وانا معقول افر الورق ورقه ورقه والتى اخترعها المخلوع
واتحبس يا ولداه بتهمه سب الذات السباعيه وعرفت انهارده انهم افرجوا عنه لكن القضيه شغاله !
اما الموضوع المبتكر او مفاجأه الموسم فهو مظاهرات اخونا السلفيين بتوع تحريم المظاهرات والخروج ع الحاكم دلوقت ياقلب امهم متشحتفين  وهايمسكوا حته من السما على الاخت كاميليا اللى انا شخصيا لا يهمنى ان كانت اسلمت او ظلت على مسيحيتها لانه موضوع شخصى بحت يخصها هى لوحدها ان شالله تكون بتعبد العجل ابيس هى حره ولا اكراه فى الدين يعنى اللى بيعملوه اخواتنا البعدا مافيهوش ذره عقل عاملين مظاهرات واتجرأوا وبيهددوا كمان والدنيا مشعلله واخر حلاوه
واحد خياله واسع قالك دى مخطوفه ومحبوسه فى دير او كنيسه وحاطينها جنب قفص الاسود الجعانه من شهر ونص مستنيه ياكلوا كامليا واخواتها بالهنا والشفا ويهضموا بقزازتين بيبسى من الحجم الجامبو بناء على كلام سليم العوا اللى رأى فيما يرى النائم ان الكنائس مليانه اسود جعانه ومخازن اسلحه وزخيره بيعدوها عشان يقوموا بغزوه  يردوا بيها على غزوة الصناديق ياناس ياعالم كفايه خزعبلات وافتراءات خلونا نشوف اللى ورانا
احنا داخلين على انتخابات تشريعيه وعاوزين نصحى ونحط عنينا فى وسط راسنا ونعرف هاننتخب مين وليه ؟
ومين اللى عنده استعداد يخدم البلد دى بعنيه ويتحمل المسؤليه عاوزين برلمان حر يرسخ مبادئ دوله مدنيه واقتصادها جامد ومتين وتعليمها ماشى فى الطريق الصح وعمالها واخدين حقوقهم وفلاحينها متمرمغين فى العز والسمنه الفلاحى بيزرعوا قمح ودره والصحه تبقى عال والمستشفيات زى ماقال الكتاب
عشان كده لازم نعرف مين اللى هاننتخبه وقلبه على البلد ولا على الحصانه ايوه بقى ايه حكايه الحصانه اللى كانت مخلياهم يصرفوا دم قلبهم عشان يطولوها وليه يعنى يبقى عنده حصانه عضو المجلس مايقفش فى لجنه ولا يدفع مخالفات عضو المجلس ما يتفتش فى المطار ويزوغ من الجمارك وغير كده بيذل ايمان ابونا بالكارنيه طيب ايه رايكوا انه لازم تتشال كل الامتيازات دى ويبقى سعادته مواطن عادى ليه شويه امتيازات محدوده بما انه عضو برلمان يعنى ساعتها الحراميه يمتنعون عاوز بقى تخدم البلد بالوضع ده اهلا بيك اتفضل عاوز تخدم نفسك وتقلب كام فيزا حج على كام قرار علاج على نفقه الدوله وامضاءات الوزرا اللى كانت بتسعيره يبقى ياحبيب امك تلبس الجلابيه البيضا وتقعد فى الشمس لان اليغمه خلصت والتكيه صحابها قفلوها
سيبكوا بقى من كاميليا ووفاء وخلينا فى المرار الطافح اللى احنا داخلين عليه والاخوان اعلنوا الحزب بتاعهم انهارده بقى وسنوا اسنانهم علينا عشان ياكلوا تلات اربع المجلس ده غير بواقى وفضل الحزب الوطنى المنحل والمعلم طلعت اللى حب ولا طالشى وياولداه ماصدق يبقى رئيس الحزب قاموا حلوه وطلع من المولد بلا حمص فبيعمل حزب تانى عشان يطول الحمص والحلاوه كمان واحنا قال ايه مشغولين بكاميليا ووفاء ياخى احمس قاهر الهكسوس يا عالم خلوا عندكوا شويه عقل لياكلونا صاحيين انبى على قلبك انت وهو تعالوا نفكر فى المفيد ونستعمل عقلنا بدال مانبقى زى اسماعيل يس لما اشترى العتبه الخضرا وساعتها نقعد نندب وننعى بختنا  والله الموفق والمستعان

الجمعة، 15 أبريل، 2011

وماذا بعد التصرفات الفرديه

حزينه ومقهوره لان ما يحدث وبشكل متكرر من افراد الشرطه العسكريه وبشهاده الضحايا  الموثقه هو تجاوزات غير آدميه وغير مقبوله لقد قام الشعب بعمل تاريخى ولا شك  لنتطهر من مستنقع الفساد الذى اغرق البلاد والعباد وهوى بمصر الى مكانه لا تناسبها ولا تليق بها ابدا داخليا وخارجيا وعانينا طويلا من القهر وتكميم الافواه  والانتهاكات من رجال الشرطه على مدى عقود
 وعندما ثار الشعب مرت علينا ثمانيه عشر يوما فى اصرار كامل على ان يرحل النظام  فالشعب  يريد حريه و ديموقراطيه حقيقيه وكرامه فى وطنه  وبرغم الجرحى والمصابين والشهداء اللذين روت دمائهم تراب مصر لم نهاب ولم نتراجع  لاننا نريد ان نعامل كبشر من حقى ان اعامل كإنسان.......  وكم كنا فخورين بجيشنا عندما قام اللواء الفنجرى بتقديم التحيه لارواح هؤلاء الشهداء
 و لولا فضل الجيش ماكنا وصلنا لما نحن فيه الان وتلك حقيقه لن يستطيع ان ينكرها احد
ولكن تجاوزات الشرطه العسكريه فى حق الشعب تفتح ابوابا كثيره لضعاف النفوس وما يطلق عليه الثوره المضاده وفلول النظام ليضغطوا بقوه على هذا الجرح ليزيد الالم وتحدث الوقيعه لا قدر الله بين الجيش والشعب وفى النهايه نحن الخاسرون .
سعدنا كثيرا بالتحقيقات مع من نهبوا مصر وعاثوا فيها فسادا ولم يكاد يمر 24 ساعه على القرارات العادله التى اتخذها النائب العام بالحبس على ذمه قضايا عديده  لهؤلاء المتهمين واولهم الرئيس المخلوع واولاده  ( والذى اطل علينا بخطاب تفوح منه رائحه اللعب بمشاعر الناس وتتسم فى الوقت نفسه بنبره التهديد لكل من تجرأ وذكرعلانيه انهم فعلوا وفعلوا ) ذلك الذى لم نكن نتخيله ولا فى احلامنا قبل الخامس والعشرين من يناير
مساء اليوم كان هناك مؤتمرا شعبيا فى امبابه ضد هذه الممارسات ولكن انتهى الامر  بمحضر فى قسم الشرطه  لضابط الجيش الذى تدخل لفض المؤتمر بالقوه تسبب فى جرح ناشطه كانت تحضر المؤتمر والذى خرجت منه بثلاث غرز فى الرأس وكرسى فى الكلوب فانقلب الموضوع لمشاجره كبيره وهناك جرحى  وحمدا لله انه لم يكن هناك قتلى وذكر البعض وجود السلفيين فى القصه وانتهى الموضوع بانصراف الضابط دون ان يكون هناك حتى وعد بالتحقيق فى الموضوع  من الذى يشعل النار كلما قربت ان تنطفئ وهل تدخل الضابط  لان المؤتمر كان ضد ممارسات الشرطه العسكريه ؟
  نرجو من المجلس العسكرى سرعه التحقيق فى الواقعه حتى يتأكد الناس اننا فعلا قد بدأنا عصرا جديدا نتمتع فيه بحقوقنا كمواطنين احرار فى وطن حر، نعلم تماما ان هذا الوضع مرهق بالنسبه للجيش وان مكانهم هو ثكناتهم وانهم ضحوا من اجل مصر وشعبها وقبلوا ان يحملوا على عاتقهم امانه  وانهم يقومون بدور صعب فى حمايه الوطن ومكتسبات الثوره ولكن هذه التجاوزات الفرديه والتى تنتشر بسرعه بين افراد الشعب عن طريق الانترنت والموبايل وتكون فرصه للفضائيات لتحقيق السبق الصحفى بالتقارير المصوره التى تسئ الينا جميعا
 اننا كما لو كنا بنينا بناء عظيما وفى النهايه نريد ان نطليه بطلاء لا يناسب عظمته وجلاله  .
كنا نتمنى ان لا يحدث تجاوزات  قد تكون فرديه مثلما قال لنا اللواء عتمان  فى فض اعتصام طلبه اعلام بالقوه او فض اعتصام فجر السبت فى ميدان التحرير  او ماحدث مساء اليوم فى امبابه  وماذا بعد يا سياده اللواء الى اين تأخذنا تلك التجاوزات الفرديه الا يجب محاسبه هؤلاء ؟
هذا حق من انتهكت ادميتهم وضربوا وسحلوا وتعرضوا للعصى الكهربائيه وكشف العذريه والمحاكمات العسكريه للمدنيين وهل هذا يليق بالثوره البيضاء التى ابهرت العالم ؟
لابد من سرعه اتخاذ الاجراءات القانونيه اللازمه مع هؤلاء الضباط نحن نحب الجيش ونحترمه ونريد ان يكون شعور متبادل نريد للجيش ان يحبنا ويحترمنا  مادمنا لم نخطئ ومادمنا نريد ان نصل بالوطن لبر الامان .

المؤتمر الشعبي لرفض المحاكمات العسكريه للمدنيين