الأحد، 14 أغسطس، 2011

فلنكتفى بهذا القدر وسيب الميكروفون

تطل علينا الصحف وبرامج التوك شوز بأخبار الاخوه السلفيين اللى ماكناش بنسمع لهم صوت ايام المخلوع ولا تعليق على اى من جرائم النظام الفاسد ؛ حتى فى خطبه جمعه لغايه ما الشعب قام بثوره يناير .
واللى كان شيوخهم بيكفرونا وبيحرموا الخروج على الحاكم وبيطلبوا من الناس يروحوا اتفرجوا واحكموا .


بس لا احنا مش هاننسى مواقف اللى كانوا معانا واللى كانوا ضدنا برضه ؛ الاخوه اللى بيطلبوا دلوقت تطبيق الشريعه كنتوا فين من تلاتين سنه ماطلبتوش ليييه تطبيق الشريعه من المخلوع ونظامه ؟
وبعدين هى الشريعه بتقول انك تروح تقنع اهالى الشهدا انهم يتنازلوا عن القضايا وياخدوا قرشين ويحمدوا ربنا بمنطق اهو احسن من مافيش ؟
ربنا سبحانه وتعالى قال : (ولكم فى القصاص حياه يا اولى الالباب )وان كنتوا تقصدوا الديه امال فين حد الحرابه ؟
الناس دى بتستهتر بالقانون وتطبيقه ومش عاوزين القتله يتحاكموا امال لو مسكوا الحكم هايعملوا فينا ايه ؟



لا وايه الشيوخ الكبار تلاقى الشيخ من دول عايش فى قصر منيف وراكب عربيه بالشئ الفلانى ويقول للفقرا التظاهر من اجل طلب الحقوق حراااااام يا حلاوتك يا شيخنا امال ايه اللى حلال ؟
و فاتح قناه فضائيه بتمويل خليجى طبعا بتدخله ملايين سنويا من الاعلانات ماهو اللى بيتفرجوا عليها انصاف المتعلمين والناس البسيطه اللى ماكانوش لاقيين نفسهم فى ظل النظام الفاسد فبيمشوا وراه عشان يمكن ياخدهم للجنه ؛ و بيستغل ده اسوأ استغلال فى جنى الارباح وحسبى الله ونعم الوكيل .
وكلنا عارفين الدور اللى لعبتوه فى الاستفتاء وغزوه الصناديق واللى مش عاجبه امريكا وكندا موجودين ؛
وبعدين ازاى هاتطبق الشريعه و عندنا مصريين مش مسلمين هاتعمل فيهم ايه دول النبى صلى الله عليه وسلم لما دخل المدينه عاش مع كل اهل المدينه مسيحين ويهود وكفار كمان وماكانش متعصب زيكم والنبى ص برضه قال( استوصوا بأقباط مصر خيرا)
لو سعادتك طبقت الشريعه هتتعامل مع المصريين المسيحين ازاى ؟
يعنى مثلا لو فى عصابه سرقت بنك والعصابه دى فى منها مسلمين ومسحيين هاتقطع ايد المسلم طب والمسيحى الغير خاضع للاحكام دى لو قطعت ايده منظمات حقوق الانسان ودول اجنبيه كتييير هاتتدخل وتعمل مشاكل ويمكن تقلب باحتلال يا ريس بحجه الدفاع عن الاقليه المضطهده طبعا.
الدول اللى بتطبق الشريعه بيطبقوها على الامراء وكبار القوم اللى سارقين وناهبين شعوبهم ولا بيطبقوها على الفقرا الغلابه اللى مالهومش ضهر ؟ هو ده اللى هما عاوزينه
تبقى مصر ولايه تابعه للانظمه الديكتاتوريه بإسم الدين ربنا مقالش كده ونبيك قال لو فاطمه بنت محمد سرقت لقطعت يدها انتوا بقى عاوزين انهى شريعه ؟
مصر دى بتاعتنا كلنا مسلمين ومسحيين وبهائيين وشيعه مصر مدنيه تستوعب كل الثقافات فلنكتفى بهذا القدر وسيبوا الميكرفون.
الديموقراطيه اللى انتوا بتحرموها هى السبب فى انكوا تنزلوا التحرير وتعبروا عن رأيكوا بحريه وسبحان الله فى نفس اليوم تحصل تفجيرات العريش ده تخطيط مين ؟ ويعنى ايه هاتحولوها اماره هو احنا هانرجع للعصر الاموى مثلا ؟ عاوزينا نترحم على امن الدوله اللى كان ممشيكوا جو الحيطان ؟ ومش فاهمه ليييه المجلس سايبكوا علينا تعملوا اللى انتوا عاوزينه؟
ياريت ترجعوا للدعوه والفضائيات والاعلانات والخطب والدروس وابعدوا عن السياسه يرحمكم الله .

هناك 4 تعليقات:

  1. انا مسلمة مش عارفة اذا كنت مسلم ولا لأ بس حابة اسالك سؤال انت في الحدود وعرفت عنها كل حاجة ولا بتهاجم وخلاص ...
    تاني حاجة لو في دول متقدمة زي امريكا كان بتقطع يد السارق وكان ده في دستورها مش في شرعها يا ترى كان هيطبقوا على اي حد ولا ناس وناس ياعني لما احكم على حد قتل حد بالقتل يبقي كده بيطبق الشرع لان القاتل يقتل ولا ايه طيبمعنى كده انه هيطبق على اي حد انت فاهم ولا الهوى عميك

    ردحذف
  2. القانون مافيهوش زينب والدول الديموقراطيه تطبق القانون بلا تمييز على الوزير والغفير المسلم وغير المسلم وده اللى احنا عاوزينه بس كده يعنى الموضوع بسيط

    ردحذف
  3. هتلاقى حد يا حنان بيقولك دلوقتى

    احذرى يا أخت .... لحوم العلماء مسمومة
    على فكرة حكاية لحوم العلماء مسمومة دى اكتر جملة بتنرفزنى فعلا ، لانها كلمة يراد بها إلباس الباطل ثوب الحق
    أصلا دى لا حديث و لا قرآن ، يعنى اللى قالها كان عالم يريد ان يصبح فوق مستوى النقد و بس
    و بعدين مهو على كده ممكن المخلوع كان يقولنا
    لحوم الحكام مسمومة
    طيب انا عندى فكرة.... مش هى لحوم العلماء مسمومة؟
    كل واحد فيهم بقى يحط لسانه جوه بقه بدال ما يعض لسانه و هو بيتكلم و يجيله تسمم
    أو يتكلموا فى الدين اللى هما بيفهموا فيه و بس
    يأمروا بالمعروف و ينهوا عن المنكر و البغى
    مش يتبعوا أهوائهم و أهواء الحكام - أياً كانوا - و بس

    ردحذف
  4. اه والله لو كل واحد يفتى فى اللى يفهمه يبقى تمام بدال ما احنا بقينا 85 مليون سياسى كل اللى بتمناه دوله مدنيه ديموقراطيه مش صعب اكيد

    ردحذف