السبت، 25 فبراير، 2012

احنا شعب عاتشفى !!!

الدنيا برد والشمس غايبه واليوم شكله كئيب ؛ حدثت نفسى وانا مازلت فى فراشى لم اغادره بعد فقد كنت اشعر بالكسل ولا اريد ان اترك الفراش الدافئ ؛ نظرت فى ساعه الحائط وجدتها مازالت التاسعه ياله من يوم طويل نهضت بصعوبه لاعداد القهوة الى ان تأتى ام يس الاربعينيه المتحذلقه والتى تساعدنى فى اعمال المنزل تأخرت اليوم مع انها تأتى فى التاسعه تماما ؛ اعددت قهوتى والقيت نظره سريعه على عناوين الصحف وجلست اتابع الاخبار على قناه الجزيره الى ان جائت معذبتى (ام يس) وكان معها يس او ديك البرابر كما تسميه فهو ولد وحيد بعد اربعه بنات ؛ اليوم السبت اجازته واحيانا ياتى معها قائلا انه جاء ليساعدها لكنه يأتى ليلعب مع اولادى
الحقيقه اننى احبه لانه مؤدب ولطيف ولا يثير المشاكل ؛ وتتمنى هى ان تراه ظابط شرطه والدبابير منوره على كتفه ؛ حتى بعد الثوره وانكسار الداخليه وكل مايحدث .. لم تغير رايها فهى ترى ان الثوار ماهم الا شويه عيال صيع لم يجدوا من يربيهم وان الشرطه بريئه تماما لانه كان ولابد ان يدافع الساده الضباط عن الاقسام وان بتوع محمد محمود قابضين فلوس طبعا عشان يولعوا فى الوزاره ثم ايه اللى وداهم هناك ويستاهلوا !!!!
هذا رأيها بالرغم من محاولاتى المستميته لاقناعها بوجهه نظرى التى تختلف مع قناعتها المستمده من الضاكتور عكاشه كما تسميه...
تركتها تمارس عملها وانشغلت بالاخبار وبعد قليل وجدت ابنى ياتى الى مهرولا ماما ... ماما يس بيقول انه كان مع امه امبارح فى العباسيه !!!
سالتها: انتى رحت العباسيه فعلا يا وليه ؟؟؟؟؟
ردت : ايوه امال ايه عشان نساند الجيش .. وسكتت برهه ثم استطردت احنا عاوزين الجيش يامدام عاوزينه يقعد يحمينا لكن انتوا ...اعوذ بالله ... عاوزين توقعوا الجيش وتخربوا البلد ولما نمشى الجيش مين اللى يمسك البلد يعنى ؟؟؟؟
حاولت اقنعها ان ده مش مظبوط وان الخلاف مع المجلس العسكرى فى طريقه ادارتهم السياسيه للبلاد وده حقنا

قالت : طب واللى عملتوه فى الريس مش حرام عليكوا ؟؟؟ هو ابن كلب وحرامى اه لكن مايصحش الدول التانيه بيقولوا علينا خونه وبنمرمط الروياسا (جمع رئيس ) ؛ واحد سميناه؛ وواحد ضربناه بالنار ؛ وواحد ادينا مرمطناه فى المحاكم وعاوزين كمان نوديه اللومان مع الحراميه وقتالين القتلا (امال هو ايه ؟ )
قلت : ماهو حرامى وقتال قتلا فعلا
قالت : بس ده رمز .. تاريخ.. رئيس مصر مايتبهدلش ؛ حاولت افهمها ان اللى بتقوله خطأ كبير لكن لاحياه لمن تنادى فهى مقتنعه تماما بافكارها التى كونتها من عكاشه واشباهه .
ادركت الان فقط لماذا يستميت المجلس العسكرى فى احكام قبضته على الاعلام .... من اجل ام يس وامثالها من المواطنين البسطاء والذين هم ضحايا مبارك بالاساس .
لارغبه لدى فى الجدل اليوم تركتها تنهى عملها وعندما انتهت واستعدت للمغادره اعطيتها المبلغ المعتاد ولكنها طلبت زياده..
سالتها : ليه ياام يس زودتى الفيزيته ولا ايه ؟؟؟ قالت : لا بس اصلي عاوزة اتبرع للشيخ حسان ماهو بيلم فلوس للجيش عشان المعونه هتتقطع ومش امريكا اللى هاتصرف علينا احنا مش عاوزين من وشهم حاجه ولا ايه يامدام ؟؟؟؟
قلت لها متتأخريش الاسبوع الجاى وصوت محمد كريشان فى الخلفيه ينقل مايحدث فى سوريه